Veikindi og afmæli

Hæ þið

Jamm, veikindapakkinn bankaði uppá af fullum krafti á sunnudaginn.  Viktor Óli er búinn að vera veikur síðan þá   Með hita frá hell, sem gengur eitthvað lítið að ná niður, alltaf skal hann rjúka upp á kvöldin.......fór hæst í 40°C í fyrrinótt, það var lítið sofið þá nótt.  Lystalítill en duglegur að drekka.  Hann er með svo mikið nefrennsli þetta grey að hann hleypur næstum í hina áttina þegar hann sér mig teygja mig í tissue bréf, er orðinn hundleiður á þessu snýteríi allan daginn.  Vona svo innilega að hann fari að ná sér, þetta er ekki eitt af því auðvelda við móðurhlutverkið, afskaplega sem maður verður hjálparvana þegar þessi kríli verða veik

Í dag átti Þorsteinn afmæli, að vísu voru nú ekki svona mörg kerti á kökunni, þau voru þó alveg 10 !!  Það beið pakki á borðinu í morgun þegar hann kom fram, og eftir að vera búinn að skófla í sig morgunmat þá opnaði hann pakkann og úr honum kom úr !  Ekkert smá ánægður   Var alltaf að kíkja á klukkuna og láta ermina nú aðeins dragast upp fyrir þannig að maður tæki nú örugglega eftir því að það væri úr á handleggnum á honum hehehe   Mér tókst inná milli snýtinga að skella í eina skúffuköku, og leggja drög að vöfflum, og hringja og bjóða í smá kaffi.  Þannig að það varð úr þessu ágætis kaffisamlæti sem hann var mjög ánægður með, hann fékk slatta af gjöfum sem hann var í skýjunum yfir, húfu, trefil, tvenna vettlinga, hálsmen og pening.....jú og boxer brækur   Hann ætlar sko að nota aurinn í að kaupa sér Playmo !  Það er númer 1 2 og 3

Þannig að hann var mjög ánægður með daginn, og þá er ég sátt   Takk þið öll sem kíktuð, og líka þið sem munduð eftir honum og hringduð í hann, honum þótti óskaplega vænt um það (og mér líka)  

Læt þetta duga í bili, það er eins gott að ná einhverjum svefni á meðan maður getur, það er víst aldrei að vita hvernig nóttin verður

ÁRÍÐANDI TILKYNNING !!!

JÆJA LESENDUR GÓÐIR !!!

BARA AÐ LÁTA YKKUR VITA AÐ ÞAÐ ERU EKKI
NEMA 96 DAGAR TIL JÓLA !!!!!!!!    

Ég gerðist hetja í dag....

....og lagði grunninn að því að gerast blóðgjafi !  Blóðbankabílinn var á planinu hjá okkur á N1 í dag og loksins lufsaðist ég til að skokka þar yfir, fór í prufu og ef ég heyri ekkert í þeim í 2 vikur, þá hefur verið allt í lagi með mig og mitt blóð og ég get orðið gjafi.

Ég fór að spá í þessu þegar ég sá bílinn, að það væri hálf kaldhæðnislegt að gera þetta ekki, ef maður mögulega getur og er aflögufær ef svo má segja.  Ef eitthvað kemur uppá og maður þarf að þiggja blóð, er þá ekki sjálfsagt mál að hafa lagt smá inn líka til að hjálpa öðrum sem á þurfa að halda ??  Það finnst mér amk  
Þannig að ég vona að ég heyri ekkert í þeim næstu 2 vikurnar



Ert þú blóðgjafi ??  Vissirðu að til að mæta þörfum samfélagsins, þarf Blóðbankinn um 16.000 blóðgjafa á ári eða 70 blóðgjafa á dag. Haft er samband við 8 -10.000 virka blóðgjafa á ári hverju og gefa þeir u. þ. b. 15.000 blóðgjafir.

Mér hefur misheppnast hrapalega...

....einhvers staðar í uppeldi elsta sonar míns.  Það virðist vera sama hvað er gert eða hvernig hlutirnir eru framkvæmdir, hann ber ekki virðingu fyrir neinu sem er gert eða sagt við hann
Útivistartímar.....til hvers ??  Hann kemur of seint heim.  Taka til eftir sig......til hvers ??  Ég hef víst ekkert annað að gera en að ganga á eftir honum og ganga frá eftir hann.  Fara eftir reglum sem eru settar.........til hvers ??  Fari það í heitasta bara
Ég gat talið á fingrum annarar handar hérna um daginn hversu oft hann kom á réttum tíma heim í kvöldmat.......á endanum sagði ég við hann að ef þetta kæmi fyrir aftur, þá hlyti það að þýða að hann væri bara alls ekkert svangur og þyrfti þá væntanlega engann kvöldmat.  Hann kom heim kl. ½ 8 í kvöld   Þá var ég búin að ganga frá eftir matinn og var að klára að vaska upp.
Hann er í 5. bekk, og ég er ennþá, á hverjum einasta helv......degi að tönglast í honum að taka nestisboxið uppúr töskunni og ganga frá úr leikfimitöskunni.  En gerist það ??  Ónei !
Að biðja hann að gera eitthvað hérna heima hjá sér er eins og draga úr honum tönn.  Og ekki segja að strákar séu bara strákar, það er engin afsökun..........

Mikið hlýt ég að vera ömurleg móðir fyrst honum finnst í lagi að koma svona fram




Og fjandans stjörnuspáin í dag er ekki að gera sig:

Naut:
Varúð! Þú ert í hættulega alvarlegu skapi. Reyndu að koma auga á það sem er fáránlega fyndið við aðstöðu þína. Það verður ekki erfitt.

Það var nefnilega það.........ég sé bara EKKERT fyndið við þetta !!

Mánudagur...

...og ný vinnuvika hafin.  Strákarnir fóru til pabba síns á föstudagnn og mér var boðið með sem "maka" frænku minnar á árshátíð þeirra í Húnabókhaldi og Efrimýrarbúinu sem var haldin vestur á Staðarflöt, rétt við Staðarskála.  FRÁBÆRT í einu orði.  Herbergin alveg frábær, maturinn súper og þjónusan alveg meiriháttar.  Ég hef aldrei farið á hótel eða annan gististað þar sem maður fær sent heim súkkulaði nánast um miðja nótt !  Eitthvað langaði einni frænkunni minni í súkkulaði svona þegar fór að líða á, og skömmu síðar var Eiríkur mættur með fullt af súkkulaði í poka handa okkur að maula á   Alveg meiriháttar   Fólkið skreiddist í bælin á misjöfnum tíma í misjöfnu ástandi, ég og Árný vorum síðastar að pilla okkur inn rúmlega 4 og áttum þá eftir að spjalla helling
Gullkorn kvöldsins átti Árni Björn alveg tvímælalaust........eitthvað bar það á góma að ég hafi smakkað strút þegar ég fór til Afríku á sínum tíma og hann varð stórhneykslaður !  "Ástu strút ???  Það er bara eins og að éta Bamba !!  Hann kemur með börnin !!!"  Við ætluðum ekki að ná okkur úr hláturskastinu, þetta var alveg frábært, ég mundi jú að hafa heyrt það sem krakki að storkurinn kæmi með börnin en minnist þess ekki að hafa heyrt um barngóðann strút

Gærdagurinn fór svo BARA í leti.......þær komu hérna seinnipartinn Árný og Vala, og við lágum eins og klessur, átum hamborgara, jöpluðum á einhverju súkkulaðikyns.....og horfðum á imbann   Ferlega notalegt

Eftir vinnu í dag fór ég í sveitina að hjálpa Árný pínu, fórum svo í Skálann að snæða og svo fórum við heim til Villa í flashback kvöld.  Ég fjárfesti nefnilega um daginn í Stellu í orlofi á DVD.
Ohhhh vá, hvað það var gaman að sjá hana aftur.......hef ekki séð hana í fleiri fleiri ár.
Hver man ekki eftir þessu:

"Þú kveiktir í typpinu á pabba !"
"Hvar er veskan mín frú Stella?"
"Er þetta partur af prúgrammet?"

"Ég var að fara í medíferd við mína alkohúlistaprúblem"
"Hver á þennan bústað ??  Já eða nei ?!?!?!"
"Út með gæruna!!" 

BARA besta mynd sem hefur verið framleidd

Takk fyrir mig í bili.............þar til næst

05-09-07

Það hefur verið partur af daglegri rútínu hjá mér og Matthíasi (já og Viktori líka) að keyra um eftir leikskólann.  Matthías tók uppá þessu fyrir svolitlu síðan, að biðja mig um að taka hring eftir að ég sótti þá, það var eins og hann þyrfti á því að halda að tjúna sig niður eftir annasaman dag á leikskólanum.  Stundum er það einn hringur, stundum nokkrir og um allar göturnar hérna, stundum uppí hesthúsahverfið, eða nýjasta æðið......"mamma viltu keyra uppí gamla bæ?"

Í gær keyrðum við meðal annars út að bryggjunni.  Fórum ekki útá hana þar sem það var vont veður og sjórinn frussaðist uppá bryggjuna í stórum gusum.  Augun á drengnum stækkuðu um helming......"mamma, sjáðu hvað sjórinn er brjálaður?!"  Í dag gátum við hins vegar farið útá bryggjuna, það var fínasta veður og enginn gusugangur  
Þetta er okkar spes tími saman

Það er hljótt í kotinu, strákarnir löngu sofnaðir......og ég er að hugsa um að fara að dæmi þeirra og skríða uppí líka......það er gott að sofa

Kveð ykkur í kútinn í bili.......þar til næst

Ég hata þig !!

Þetta heyrði ég í fyrsta sinn frá rétt tæplega 10 ára gömlum syni mínum fyrr í kvöld.  Þeir bræður voru búnir að taka ansi góða slagsmála aríu hérna á sófanum þannig að ég rak þá báða í rúmið.....klukkan var að verða 9.  Þeir stormuðu í sitthvort herbergið grenjandi, þeir skelltu þó ekki hurðunum í þetta sinn og ég heyrði ekkert dót lenda á hurðinni.  Svo heyri ég þetta frá þeim eldri, gargað ofan í koddann..........ég var að vona að ég fengi nokkur ár í viðbót "éghataþig" frí

Hann kom svo fram þegar hann var búinn að jafna sig og knúsaði mig og sagði fyrirgefðu......."mér líður svo illa í hjartanu að hafa sagt þetta"

Hann á ammæl'í dag :o)

Bestasti besti vinur minn á afmæli í dag, og í tilefni af deginum bauð hann okkur "konunum" sínum út að borða á Pottinum og Pönnunni   Jú og strákunum líka, þeir fylgja víst óhjákvæmilega með haha   Ég er svoooooo sprungin !!  Takk ofsalega vel fyrir okkur Villi minn, þú ert yndi

Jólin komu snemma í ár :o)

Ójá   Ég fékk símtal í morgun......."Hvað kosta myndirnar sem eru á blogginu þínu ?  Má ég gefa þér þær ?"  Og í kjölfarið var laggt inná reikninginn minn og mín er búin að leggja inn pöntun fyrir þeim   Ohhhh mér finnst þetta svoooo æðislegt, hlakka til að fá þær og sauma þær
Þúsund þakkir fyrir mig

Svona á víst EKKI að gera þetta ;o)

Þetta gæti verið ég.........eitthvað svo minn stíll hahaha